Medios, comunicación e poder na UDC

Esta tarde, no seminario de verán da UDC Medios, comunicación e poder que terá lugar no Espazo Normal, dentro da sesión de Análise de medios, falarei principalmente da acción no ámbito local pasando, entre outros, por proxectos como:

Tamén centrarei unha parte da exposición nas ferramentas máis populares á hora de articular a comunicación e a actividade cara a dentro e cara a fóra:

E nas redes sociais máis utilizadas para propósitos xerais e específicos:

Terei o pracer de partillar mesa e ideas con Javier Toret e Iván Sánchez.

Os meus primeiros mocasíns

Levoume tempo rematalos porque este verán me está tocando traballar máis do que pensaba, pero por fin os calcei. Xa teño os meus primeiros mocasíns feitos desde cero. Sei que calquera profesional que os colla nas mans lles achacaría mil defectos mais eu sei que descalza xa nunca andarei.

Mirei uns cantos vídeos en YouTube para aprender as técnicas básicas, merquei a pel na rede logo de moito buscar a 2€/pé en elrastrodelapiel.com; xa me fixera anteriormente con algunha ferramenta (pouca pero boa, como me recomendaran) e merquei tamén un libro de patróns de calzado, porque os de libre disposición non me resultaban convincentes.

E xa está, marcar, cortar, pegar solas, preparar tiras e coser. Síntome como unha cativa con zapatos novos 😛

Problema de cobertura wifi solucionado

Desde hai uns meses teño un Asus Vivobook que non se levaba ben coa recepción da wifi en Ubuntu. Trátase dun portátil cunha pantalla táctil, que hei de recoñecer que non uso demasiado a non ser cando me vexo obrigada a traballar desde Windows 8 e un microprocesador i5. Mirei solucións mais as poucas que me daban esperanzas eran complicadas de máis para min e non parecían funcionar en todos os equipos.

Desde a actualización de hoxe, todo funciona perfectamente. Atrás ficaron os problemas de teclas de funcións e, agora tamén, a conectividade á rede da casa.

Todo en orde.

adtlantida.tv: 4 últimos días de crowdfunding

Adtlantida.tv from Adtlantida.tv on Vimeo.

Coñeces Qik, Livestream ou Bambuser? Son apps que instalas no móbil e permítenche emitir vídeo ou audio en directo a través de internet, colocando un reprodutor en calquera páxina web ou blog. Contas cun espazo de almacenamento e os vídeos poden reproducirse tamén en diferido.

Adtlantida.tv vai ser así. Pero grazas a Beka Iglesias e a Berio Molina, teremos unha app en galego, sen publicidade e unha mediateca onde os nosos vídeos serán facilmente localizábeis. Con Adtlantida.tv poderemos emitir vídeo en directo non só desde un móbil, senón desde dous ao mesmo tempo por canal, para dar dous puntos de vista do mesmo acontecemento e sen censura.

O proxecto está en goteo.org E por 55€ podes ter conta de streamer o primeiro ano (a partir do segundo ano a app estará dispoñíbel para todo o mundo de balde). Tamén podes colaborar con cantidades menores, por suposto.

Esta xente necesita apoio e o seu proxecto é vital para a nosa cultura. Por primeira vez teremos unha mediateca ben visíbel na que ir construíndo entre todas a memoria do noso povo e que non estea a expensas de que ningún goberno poida eliminalo, como acontecera con flocos.tv. O poder da imaxe no móbil desde unha aplicación en software libre, comunitaria e totalmente de balde feito realidade por Beka Iglesias e Berio Molina. É importante que colaboremos!
Páxina web oficial do proxecto: adtlantida.tv

Marta Rivera: a raposa no galiñeiro

Porque me fervía o sangue no corpo escribín este artigo en Praza.

«Que o inventor do sistema de coordenadas cartesiano teña sido a mesma persoa que afirmou que a alma se sitúa na glándula pineal, resulta chocante. Descartes estivo tan atinado nun aspecto como para influír poderosamente no desenvolvemento do cálculo moderno, como desatinado noutro. “Somos así de limitados” díxome Antonio Escohotado nunha ocasión.

É fácil solidarizarse coa situación das linguas mapuches desde Galiza porque América fica lonxe, non se esixe argumentación a unha obviedade e, sobre todo, non xera confronto cunha parte do contorno social máis próximo, porque a súa defensa non redunda nunha perda de privilexios; simplemente hai algunhas persoas que denuncian a situación destas linguas minorizadas e unha maioría indiferente.

Ignorantes cando menos parécenme as persoas que denuncian opresión do galego sobre o castelán sen querer decatarse de que todas as linguas son igualmente importantes e deben gozar dos mesmos dereitos; parece mentira que teñamos que seguirlles lembrando este punto a estas alturas. Moitas destas persoas que agora protestan acostumaban declararse indiferentes cara ao galego até que sentiron que perdían algo.

Eu non podo escolarizar os  meus fillos en galego, os escasos medios de comunicación na miña lingua resisten a base do esforzo heroico dalgunhas persoas. A maioría dos médicos non falan a miña lingua, nin os notarios, nin os xuíces, nin a policía, nin o persoal dos bancos. Tampouco podo ir ao cinema en galego, nin sempre obter impresos oficiais se os demando na miña lingua. Cando quixen crear unha sociedade, a súa constitución demorou máis días do normal por requirirmos a escritura en galego, e periodicamente hei de escoitar a aparente pregunta sobre por que falo galego se en castelán nos entendemos todos sen problema. E aínda queren facerme crer que hai persoas infravaloradas ou limitadas nas súas liberdades por expresarse en castelán na Galiza? […].» {Ler completo Praza Pública}