Amazon e o iPad

Publicado o 5 Abril 2010 por Tati Mancebo

Parece ser que a app de Amazon para o iPad presenta serias limitacións que fan que o usuario tire a conclusión de que foi pensada para que se merquen os libros desde o Kindle para logo transferilos para o iPad. Funcionará? Joe Wikert pensa que non, que vai preferir mercar os libros directamente na tenda de Apple desde o propio iPad porque le mellor nel: non lle cansan os ollos, como moitos anunciaban, ten wifi, pode manexar os libros de modo moito máis áxil, en fin, que o Kindle (e todos os lectores monocromos e desconectados) lle parece un aparello do pasado.

Joe Wikert’s Publishing 2020 Blog: Amazon’s Next Move.

Interesa pouco o ebook?

Publicado o 26 Marzo 2010 por Tati Mancebo

Esta é unha das enquisas do día no Galicia Hoxe. A participación está moito por baixo da media habitual, mais eu non creo que sexa tanto pola falta de interese polos ebooks, como polo desinterese polos lectores de ebooks de tinta electrónica. Polo caros que son, polo pouco versáteis, poque a maioría da xente non quere máis un aparello senón que os que xa ten realicen máis funcións, entre elas, servir como dispositivos de lectura.

As vendas de ebooks soben 261% no último ano

Publicado o 24 Marzo 2010 por Tati Mancebo

Ebook market exploding, says new iDPF survey | TeleRead: Bring the E-Books Home.

Renovarse ou morrer: Boulder

Publicado o 18 Marzo 2010 por Tati Mancebo

Boulder está en Colorado. En Boulder hai unha libraría que está a experimentar coa impresión baixo demanda para autores locais. Se unha é unha autora descoñecida de Boulder, pode autoeditar o seu libro e, desde 25$ por un depósito de 5 exemplares na libraría, a 255 $ por que che organicen unha presentación con sinatura, pode promocionar a súa obra. A libraría di que está a facer negocio co servizo, que pode supoñer arredor dun 3% dos ingresos totais.

Boulder Book Store embraces new ‘microdistribution’ model | TeleRead: Bring the E-Books Home.

More in store: campaña de freebies de B&N

Publicado o 18 Marzo 2010 por Tati Mancebo

Máis na tenda é a tradución da nova campaña de B&N. Cada 7 días poñen no escaparate novos títulos que poden ser descargados de balde durante 4 semanas. O quid da cuestión é a educación: ofrecen libros con contidos complementarios, extras que non se atopan habitualmente nos PDFs pelados que venden as editoras e as librarías. Así van testando o valor que os clientes dan a cada plus e adestran os usuarios para que se familiaricen coa páxina de B&N.

B&N Introduces More in Store | The Digital Reader.

Unha historia de prezos

Publicado o 17 Marzo 2010 por Tati Mancebo

Retrocedamos no tempo: Amazon marca a barreira das novidades en 9.99 $. Algunha editora como MacMillan plántalle cara pero Amazon mantén en liñas xerais o seu criterio. Apple anuncia o iPad e pretende fixar o prezo dos libros. Moitas editoras plantan cara a Apple e esta recúa. Amazon vese obrigada a vender libros máis caros: inclúe un novo produto en catálogo chamado libro enriquecido que, no seu caso, inclúe textos alternativos, entrevistas exclusivas cos autores e materiais audiovisuais en xeral.

Libros electrónicos “enriquecidos”, lo nuevo de Amazon | The Inquirer ES.

A USC publicará vinte libros en formato dixital

Publicado o 15 Marzo 2010 por Tati Mancebo

O Servizo de Publicacións e Intercambio Científico (SPIC) da Universidade de Santiago (USC), que dirixe Juan Luís Blanco Valdés, vai acometer unha unha decidida aposta polo e-book, o libro electrónico. Actualmente hai unha dialéctica aberta entre o libro impreso e o dixital, pero o director do SPIC ten claro que «hai que ir por aí» para unha serie de publicacións, polo que a USC comezará a edición electrónica con vinte títulos, hai moito tempo xa esgotados, que serán comercializados como libros electrónicos.

víaA USC publicará vinte libros en formato dixital – AGE – Asociación Galega de editores.

Dixitalización novos títulos nas bibliotecas universitarias estadounidenses

Publicado o 15 Marzo 2010 por Tati Mancebo

HathiTrust Update…03.13.10 « The Proverbial Lone Wolf Librarian’s Weblog.

Aldiko: ler libros en Android

Publicado o 15 Marzo 2010 por Tati Mancebo

Como dicía na aotación anterior, se queres ler libros en formato ePub en Android, recoméndoche Aldiko que, aínda que non sincroniza por wifi con Calibre, ten para min a mellor interface de lectura de libros para móbiles que coñezo. Encántame a transición de páxinas tan suave, a facilidade para regular a intensidade da luz, e ademais é de balde.

O deseño cadrado que aparece nesta anotación é un código QR. Se instalas no teu teléfono un lector de códigos e o escaneas, abrirase o navegador do teu móbil e dirixirate directamente á sección do Market de Android onde podes descargar o lector de libros Aldiko. Pode crearse un código QR para partillar con facilidade calquera páxina web a través das múltiplas ferramentas que existen en Internet.

Como crear un ePub

Publicado o 15 Marzo 2010 por Tati Mancebo

Nate ten toda a razón. Se queres crear un ePub non tes máis que facer o seguinte:

1.-Arrastrar un arquivo (DOC/HTML/PDF) dentro de Calibre.

2.- Seleccionar conversión a ePub en Calibre.

3.- Incluír metadatos e imaxe de capa.

As florituras deixarémolas para outro día, pero aproveito para comentar que se tes un teléfono con Android, podes baixar do market unha app para ler libros -na seguinte anotación porei a miña preferida- e formatalos co calibre para lelos no móbil. Calibre permite a sincronización por wifi para subir os libros ao teu móbil sen andar conectándoo ao pc, pero en Android parece que aínda non funciona demasiado ben a cousa.